KALIBO, Aklan— Ginapahauman eon it Boracay inter-agency task force ro pagbuhos it mga bakasyunista makaron nga yuletide season.
Sa interview it Bombo Radyo Kalibo kay Deputy Ground Commander Al Rulfo, ginpahayag kara nga inde magnaba sa 2,000 kada adlaw ro nagasueod nga mga turista nga kaeabanan hay mga dumueoong para uman nga makit-an ro kaanyag it isla matapos nga ginpaidaeom raya sa an-om nga bueang rehabilitasyon.
Sa kamatuoran sigon ko Nobyembre 13 base sa andang pinakaulihing datos, nag-abot sa 2, 574 ro mga local ag foreign tourist nga nagbisita sa sikat nga isla ag ko Nobyembre 14 hay nadugangan pa raya hasta nga nag-abot it 2,748.
Samtang, masobra sa 483 mga establisyimento eon sigon ro nakapag-comply it nagakaigong requirements sa Department of Environment and Natural Resources (DENR) samtang nag-abot eon man sa 211 ro mga compliant hotels and resorts nga accredited it Department of Tourism (DoT) nga presenteng naga-operate it andang mga negosyo sa nasambitang isla.
