KALIBO, Aklan—Kumpiyansa ro malay tourism office nga magiging mabahoe nga bulig sa mga tourism establishments sa Boracay ro anunsyo ni Aklan Governor Florencio Miraflores nga umpisa sa Nobyembre 16 hay indi eon iga-require sa mga bakunadong turista ro pagpakita it RT-PCR test sa pagsueod sa isla eabi pa ag nagahilapit eon ro holiday season.
Suno kay Malay Tourism Officer Felix Delos Santos sa idaeum it Executive Order no. 028 ni Governor Miraflores, ginabuksan eon sa tanan nga mga turista sa guwa it isla it Panay ag Guimaras ro Boracay basta nga makapakita it vaccination certificate halin sa www.vaxcert.gov.ph ukon vaccination card nga may QR code kamana man ro vaccination certificate nga gin-isyu it natungdan nga Municipal Health Office.
Mag-eowas sa vaccination certificate, kinagangean sa gihapon nga magpresinta it reservations halin sa hotel nga accredited it Department of Tourism (DOT), travel details, valid identification card ag iba pa.
Sa pihak kara, ro mga turistang nakabaton pa eamang it unang dose hay obligado sa gihapon nga magpakita it negatibong RT-PCR result.
Ro exempted sigon sa swab test hay ro daywang dag-on panaba.
Samtang, ginpahayag pa ni Delos Santos nga magaresulta raya sa pagbalik sa trabaho it mga apektadong tourism workers.
Ginaeauman nga maga-average sa 2,000 hasta 3,000 per day ro tourist arrivals halin sa dating 1,000 hasta 1,500.
Pagabuksan man hasta sa 50 porsyento ro indoor capacity para sa mga fully vaccinated sa mga venues para sa mga social events samtang hasta sa 70-percent capacity man para sa outdoor venue.
Owa sa gihapon ginapasugtan ro mga disco bars.
Imbes nga beach party, gina-promote makaron sa boracay ro health and wellness.
Sa makaron hay haeos fully vaccinated eon ro tanan nga mga trabahador sa isla nga naga abot sa 94% samtang ro mga eligible residents hay kapin sa 95% eon.
Umpisa ko Nobyembre 1 hasta 12, ro tourist arrivals hay sumaka eon sa 20,402 nga kaabuan hay naghalin sa NCR.
