Ginatantyang nagaabot sa P170 billion kada dag-on ro maduea nga kita it gobyerno kon dueaon ro value added tax (VAT) sa mga produktong petrolyo.
Suno kay Energy Secretary Sharon Garin, ro VAT sa petroleum products hay nagatuga it mabahoe nga parte it koleksyon it gobyerno, rason nga ro pagkakas kara hay magaresulta man sa mabahoe nga kakueangan sa kita it gobyerno.
Dugang pa nana, kinahang-ean it amyenda sa nagairal nga laye antes maipatuman ro pagkakas it VAT sa fuel products.
Samtang, gin-insister mat-a ni Marikina Representative Miro Quimbo nga kapin pang maglala ro sitwasyon it nasyon kon dueaon ro VAT, kapin eon sa tunga it padayon krisis sa Middle East.
Nag-ugat ro pagtaas it presyo it langis matapos ro an-om nga dominggong gyera sa rehiyon nga kapin pang nagpalala it krisis sa Strait of Hormuz, nga sambilog sa mga nagapangunang ruta it pangkalibutanong suplay it langis nga nagapalala sa pangkalibutanong krisis sa enerhiya.
Bangud kara, padayon ro pagtaas it presyo it langis sa pangkalibutanong merkado nga nakaapekto sa Pilipinas nga nagaeaum sa kueang-kueang 98% it suplay it krudo halin sa Middle East.
