KALIBO, Aklan—Ginpaathag it sangka political analyst sa Aklan nga tama eamang ro ginhimo nga pagbaeasa ni Pangueong Ferdinand Marcos Jr. sa mga miyembro it National Security Council (NSC).
Suno kay Atty. Harry Sucgang, ro pagkakas it punong ehekutibo kay Vice President Sara Duterte ag sa mga dating presidente bilang miyembro it konseho hay nagakadapat eamang eabi eon sa ginhimo ni Sara nga pagpamaeag sa liderato ni Marcos.
Nasayuran nga base sa Executive Order (EO) No.81, ro National Security Council nga ginapamunuan it presidente bilang chairperson samtang magiging miyembro man ro senate president, house speaker ag iba pang mga opisyal it gobyerno hay ginpatuman ro baeasahan para sa seguridad it kada isaea.
Pwede man nga magtaeana ro Presidente it iba pang mga opisyal it gobyerno bilang miyembro it National Security Council ag maging mga private citizens.
Ginpaathag dugang ni Atty. Sucgang nga bukon it tama ro ginhimo it bise presidente nga pagpamaeag sa administrasyon bangud nga pwede raya nga sakyan it terorismo nga makaapekto sa seguridad ag kaeowasan it komunidad.
Madumduman nga kadungan kara hay ginmanduan ro Director-General it National Intelligence Coordinating Agency (NICA), chief of staff it Armed Forces of the Philippines (AFP), ag mga hepe it Philippine National Police (PNP) ag National Bureau of Investigation (NBI) nga magtambong sa mga pagpueong it council ag umasiste sa mga deliberasyon.
Gin-reorganize man ro National Security Council executive committee ag bukon it kaibahan kara ro bise presidente.
