Posibleng sangka kaso it accidental firing ro natabu sa sangka 28 anyos nga patrolman nga nasapwan eon lang sa anang eugban nga nagapaligos sa kaugalingon nga dugo ag ginasugid nga may tama it bala it baril sa ueo sa sueod it barracks it 1st Aklan Provincial Mobile Force Company 4th Maneuver Platoon sa Sitio Murayan, Brgy. Poblacion, Altavas, aga-aga it Huwebes, Setyembre 11, 2025.
Sa pihak kara, ginklaru ni P/Capt. Aubrey Ayon, tagapaghambae it Aklan Police Provincial Office (APPO) nga nagapadayun pa ro imbestigasyon it Altavas Municipal Police Station sa insidente sa idaeum it supervision it Provincial Investigation and Detective Management Unit.
Ginapatihan nga posibleng nagapahaum eon ro biktima paagto sa Camp Pastor Martelino para sa quarterly physical fitness test kat natabu ro aksidente.
Ginduea man nana ro posibilidad nga may foul play sa insidente bangud nga owa nakitaan it anuman nga bakas it kinagamo sa sueod it anang kwarto.
Nakita sigon sa eugban ro mga bakas it dugo ag sangka baril nga ginapatihan nga 9mm pistol nga sangka PNP issued firearms.
Ginasugid nga ro biktima hay masinadyahon ag paea-istorya nga klase it tawo.
Madumduman nga dead on arrival sa ospital ro pulis tuga it lastro sa anang ueo.
Ro biktima nga owa anay ginpangaeanan hay residente it Brgy. Bita, Dao, Capiz ag haeos an-um nga dag-on pa eamang sa serbisyo.
P/Capt. Aubrey Ayon, tagapaghambae it Aklan Police Provincial Office ukon APPO
Samtang, laygay ni P/Capt Ayon sa mga kapareho nana nga pulis ag iba pang gun holders nga pirmeng isipon ro gun safety.
May mga naging insidente sigon nga nabaril ro kaugalingon matapos nga mamueaw-mueawan halin sa pagtueog.
