KALIBO, Aklan—Ginpaathag it Aklan Electric Cooperative ukon Akelco ro natabu nga unscheduled power interruptions kabi-i nga gintunaan sa pagkaduea it supply it kuryente sa pilang portion it probinsiya it Aklan.
Suno kay Engr. Jude Ropa, head it engineering department it Akelco nga bangud sa pagkasamad it cut-out sa Tinigao, Kalibo ro naging kabangdanan kara.
Haeos daywang oras sigon antes nga eubusan nga nagbalik ro power supply sa mga apektadong lugar sa idaeum it Andagao substation sa Poblacion, Kalibo feeder 2-1 ag feeder 1 halin sa substation paagto sa Capitol site.
Partikular nga naapektuhan ro bilog nga banwa it Banga, Madalag, Libacao, Balete ag portion it Kalibo eabi eon sa Estancia, Tigayon ag Linabuan Norte.
Sa pihak nga parte, gindugang pa ni Engr. Ropa nga owa man it ginaeauman nga scheduled power interruptions makaron nga domingo halin sa National Grid Corporation of the Philippines ukon NGCP.
