-- ADVERTISEMENT --

Ginmandu it Muntinlupa City Prosecutor’s Office ro pagpahilway sa masobra sa 200 nga demonstrador nga gin-aresto sa kasagsagan it 49th ASEAN Summit, matapos ro tatlong adlaw nga pagkakulong sa Camp Bagong Diwa sa Taguig City.

Base sa resolusyong ginpaguwa, adlaw it Miyerkules, Nobyembre 18, dapat eon nga pahilwayon ro mga demonstrador, mag-eowas eon lang kung may iba pang legal nga rason agud nga magapabilin sanda sa pagdetine.

Ginpirmahan ro mandu ni Senior Assistant City Prosecutor Elvin Keith Barrios ag gin-aprubahan ni City Prosecutor Aileen Gutierrez.

Ginbasura man it mga prosecutors ro mga reklamong malicious mischief ag alarms and scandals. Samtang, igapaidaeum pa sa preliminary investigation ro iba pang reklamo angot sa gina-alegar nga pag-eabag sa Public Assembly Act ag resistance and disobedience to persons in authority.

Kaibahan sa mga gin-aresto ro mga miyembro it Lakbayan ng Timog Katagalugan nga nagpatigayon it protest caravan sa Sucat, Muntinlupa City ko Nobyembre 15. Ginabaeabagan it grupo ro US-led Pax Silica initiative ag ro pagbisita ni US President Donald Trump sa Pilipinas para sa ASEAN Summit.

-- ADVERTISEMENT --

Nauna eon nga nagdihon it mosyon ro National Union of People’s Lawyers (NUPL) agud nga hinyuon ro insigidang pagpahilway sa mga demonstrador ag pagbasura sa mga reklamong ginpasaka kontra kanda.

Ginpamilit it grupo nga gin-eabag ro kinamatarung it mga gin-aresto bangud sa pagpadayun it andang detensiyon nga eampas 36 oras nga owa it kasong ginpasaka sa korte.

Samtang, nagpahayag it pagkabaeaka ro Commission on Human Rights (CHR) sa mga report it gina-alegar nga pageabag sa tawhanong kinamatarung, kaibahan ro pagka-aresto sa mga menor de edad ag pag-angkon it mga kahalitan sa pilang demonstrador.

Gin-kwestiyon man it CHR ro unang pagpamalibad sigon it mga awtoridad nga pasudlon ro andang mga abogado ag imbestigador sa Camp Bagong Diwa ko Nobyembre 15.

Padayun nga gina-usisa it CHR ro mga natabu agud nga matumod kun may natabu nga pageabag sa tawhanong kinamatarung.

Sa pihak it mandu it piskalya, indi pa makumpirma kon nakahilway ro tanan nga masobra sa 200 demonstrador halin sa kustodiya it mga awtoridad.