Gin-anunsiyo ni US President Donald Trump ro masobra sa $5 bilyong nga haega it mga armas nga gin-aprubahan it anang administrasyon para sa Pilipinas, kadungan it pagpabaskog sa relasyong pangdepensa it daywang nasyon.
Sa bilateral meeting nanda ni Pangueong Ferdinand Marcos Jr., sa Malacañang, adlaw it Miyerkules, Nobyembre 18, ginpahayag ni Trump nga ginpabahoe man it Washington ro pondong gintaeana para sa military financing it Pilipinas.
Sa pihak kara, owa pa gintumod it US President kun anong mga klase it armas ro kaibahan sa nasambit nga haega ag kun pila eon sa mga raya ro hadaea sa nasyon.
Gindugang pa ni Trump nga ginpaeapad pa gid it Estados Unidos ro kapasidad it andang defense industry pinaagi sa pagpatindog it 21 pasilidad agud nga mapadasig ro produksyon it kagamitang militar ag mabawasan ro paghueat it mga kaalyadong nasyon sa andang mga order.
Samtang, padayun nga ginapabaskog it Pilipinas ro ikasarang kara nga pangdepensa sa tunga it naga-grabeng tensiyon sa West Philippine Sea.
Nagapabilin nga mabakod ro Mutual Defense Treaty (MDT) ko 1951 it Pilipinas ag Estados Unidos, nga nagataeana it andang pagbueuligan engkaso nga makaangkon it armadong pag-atake nga sakop it kasugtanan.
Ginpamilit man ni Pangueong Marcos nga nagapabilin nga naga-isaeahanon nga treaty ally it Pilipinas ro Estados Unidos, samtang ginaselebrar it daywang nasyon ro ika-75 nga anibersaryo it andang kasugtanang pangdepensa makaron 2026.
Ro anunsiyo hay kaparte it padayun nga pagpabaskog it kooperasyong militar ag seguridad it Pilipinas ag Estados Unidos sa rehiyon.













