Kalibo Aklan ——-Bawae sa gihapon ro pagpaligos ag iba pang beach activities sa Isla it Boracay sa idaeum it Extended General Community Quarantine sa probinsiya it Aklan.
Base sa ginpaguwa nga Executive Order no. 24 ni Malay Mayor Frolibar Bautista, epektibo ko Mayo 16, off limits sa gihapon ro pagligos sa dagat ag mga pampublikong swimming pools kamana man ro pag-ehersisyo kapareho it pagdaeagan, pagtikang , boating ag maskin ro sunbathing ag pagdagyang sa mga bars.
Bantay sarado it mga otoridad ro Isla sa mga maga-eabag sa nasambit nga guidelines.
Maskin nga ginbuksan eon ro pilang establisimento komersiyal sa Isla umpisa alas-8:00 it agahon hasta sa alas-6:00 it gabi-i, apang nagapabilin nga sarado ro mga hotels, resorts ag mga gyms.
Mga residente eamang ag pilang empleyado sa Boracay ro ginapasugtan nga makasueod sa Isla.
Nauna kara, ginpahayag ni Department of Tourism (DoT) Undersecretary for Tourism Development Benito Bengzon Jr. nga nakadepende sa Inter-Agency Task Force on Emerging Infectious Diseases (IATF-EID) kun hin-uno pagabuksan sa turismo ro Boracay ag iba pang tourism destination sa nasyon.
Sa pihak nga parte, ginbilog sigon ro Tourism Response and Recovery Program agud nga mabuligan ro mga tourism enterprises nga naapektuhan it coronavirus disease o COVID-19 pandemic, kun sa siin, ro igatau nga ayuda hay nakabaehag sa economic stimulus act nga ginatalakay pa sa Kongreso.
