KALIBO, Aklan–Ginpaathag ni Punong Barangay Niel Candelario it Poblacion, Kalibo nga natapos eon ro andang distribusyon it food packs sa mga pumueoyo nga apektado it pagbaha matapos ro pagpanaeasa it bagyong Paeng.
Suno kay Kapitan Candelario nga naga-abot sa 4,600 ka mga food pack ro andang natigayun nga naipanupod halin sa gobyerno probinsyal.
Ginpasaeamatan man kara ro tanan nga ahensya nga nagpaabot it andang bulig para sa mga apektadong residente.
Sa pihak nga parte, ginkumpirma man ni Kapitan Candelario nga owa nadayun ro cash assistance distribution ko nagtaliwan nga adlaw bangud sa nakita nga “fraud” it Department of Social Welfare and Development (DSWD) ag barangay council sa listahan it mga benepisyaryo.
Bangud kara, nagdesisyon sigon sanda nga temporaryo anay nga i-hold ro pagpanupod it pinansyal nga ayuda halin sa gobyerno nasyonal.
Raya hay para taw-an it daean ro pagahimuon nga pag-usisa ag re-validation sa listahan.
Nasayuran nga gintugyan sa lokal nga gobyerno ro responsibilidad eabi eon ro pagtumod sa mga benepisyaryo.
Kung siin, ro kwalipikado nga magbaton it cash assistance hay ro mga panimaeay nga naapektuhan it pagbaha.
