KALIBO, Aklan—Nakadepende sa Department of Tourism (DOT) ro pagdesisyon kon hin-uno pwedeng makapasueod it mga lokal nga turista sa isla it boracay.
Raya hay matapos nga ginpaidaeum eon ro aklan sa modified general community quarantine (MGCQ).
Suno kay malay mayor frolibar bautista nga importante nga uman nga maka-operate ro tourism industry agud nga mapahagan-hagan ro impact it covid 19 pandemic.
Apang kinahangean nga makasunod sa new normal ro mga stakeholders agud nga malikawan ro paeag it makamaeatay nga sakit.
Nagpatigayon suno kana it dry run agud nga makaangkon it tempranong pagpahaum para sa maayos ag eowas nga pagpasueod it mga turista sa oras nga pasugtan eon ro domestic travel.
Padayun suno kana nga ginapatuman ro “no booking, no entry” sa mga turissta nga nagakahueugan nga bawae ro walk-in.
Ro aklan suno kana hay masyadong nakadepende sa turismo para sa lokal nga ekonomiya.
Pirme sigon nga naga-inspection ro mga taga-department of health ukon DOH aklan ag provincial government sa isla.
Mag-eowas kara, magatukod man sanda it inspection team agud nga mag-usisa kon ginasunod ro mga ginapatuman nga health ag safety standards ag instriktong guidelines sa pagsueod sa boracay.
Partikular kara ro regular nga sanitation ag disinfection it mga hotels, resorts, ag iba.
Regular nga inspections it tourism establishments, pagpatuman it physical distancing para sa tourist transportation ag pag limita sa numero it mga customer sa sueod it mga tourism establishments ag iba pa. Samtang, ginpasaeamatan man nana ro mga taga banwa it malay ag isla it boracay sa suporta ag kooperasyon rason nga naging madinaeag-on ro mga tikang agud nga malikawan ro covid 19 sa isla.
