Kalibo Aklan —–Ginpaisoe hasta sa Marso 20 it makaron nga dag-on ro pagpatubi it National Irrigation Administration (NIA-Aklan) sa mga kaeanasan sa probinsiya.
Suno kay Engr. Lorena Sioco, Division Manager it NIA- Aklan nga ko marso 1 kunta ro orihinal kara nga schedule it cut-off it andang water delivery, apang ginpaisoe bangud nga may pilang area sa banwa it Kalibo ro nadelay sa andang pananum .
Raya hay kasunod man it apela it Federation of Irrigators Association bangud nga kapin sa 444 ektarya it pananum ro maapektuhan sa Eastern Side partikular sa Kalibo ag sa Western Side sa Makato ag Lezo hay 481 ektarya.
Engkaso suno kana nga aeang-aeang pa ro andang pananum hay pwede sanda nga maggamit it ginpahueam sa andang asosasyon nga mga water pump.
Tuyo it cut-off it andang irrigation service delivery nga mataw-an it daean ro mga naka-pending ag mga bag-ong proyekto partikular ro construction it mga canals ag daywang diversion dams it Aklan River Irrigation System sa Kinalangay, Malinao ag Sigcay, Banga .
Ro installation it steel gate ag finishing touches eon lang sigon ro kueang it dam ag ginaeauman nga matapos sa buean it Abril ukon Mayo.
