KALIBO, Aklan — Indi sigon makaapekto ro pagsuspinde it Office of the Ombudsman sa kandidatura ni Malay Mayor Ceciron Cawaling nga planong magpa-reelect sa 2019 mid-term elections.
Sa interview it Bombo Radyo, ginpahayag ni Commission on Elections (Comelec)-Aklan spokesperson Crispin Raymund Gerardo nga hasta uwa pa it pinal nga desisyon ro Korte Suprema hay magapabilin ro pangaean it sangka kandidato sa listahan it mga nag-file it certificate of candidacy (COC).
Nasayuran nga epektibo ko adlaw it Huwebes, sa bisperas it Boracay reopening hay ginpatuman it Department of Interior and Local Government (DILG) ro an-om nga bueang preventive suspension it Ombudsman sa alkalde.
Nag-ugat raya sa kasong administratibo ag kriminal nga gindihon it DILG tuga it pagpabaya sigon sa isla it Boracay.
Katuyuan kara nga inde mapasilabtan it alkalde ro ginapatigayong imbestigasyon it anti-graft court.
Madumdumang, 16 nga iba pang lokal nga opisyal it Aklan ro ginpasakaan it reklamo sa Ombudsman bangud sa pagpabaya sigon sa Boracay.
