Direkta eon nga mabatyagan it mga pasahero ro pagtaas sa presyo it petrolyo pinaagi sa dugang nga pamasahe.
Raya hay matapos aprubahan it Land Transportation Franchising and Regulatory Board (LTFRB) ro hinyu it mga jeepney drivers nga dugang nga pisong pagtaas it pamasahe.
Sa pihak kara, ro fare hike hay para eamang sa mga jeep nga nagabiyahe sa Metro Manila, Central Luzon, Calabarzon, ag Mimaropa.
Bangud kara, kapin sa P10 eon ro minimum fare halin sa dating P9 pesos.
Sa desisyon nga ginpapanaog it Board it LTFRB, ro provisional P1 fare hike hay para sa unang ap-at nga kilometro, samtang owa eon it pagasukton nga pagpataas sa masunod nga kilometro.
Nag-abiso man sa mga public utility jeepneys sa nasambit nga mga rehiyon nga magbutang it “notice of provisional fare increase” sa sueod it mga saeakyan.
Madumduman nga nauna eon nga ginbasura ro hirit nga pagtaas it pamasahe apang nagdihon it motion for reconsideration ro mga petitioners nga transport groups.
Ko dag-on 2018 may una man nga ginpasugtan nga P10 pesos nga minimum fare kat sumaka sa P40 pesos ro kada litro it krudo apang uman nga ginbalik sa P9 pesos ro pamasahe makataliwan ro pilang buean bangud sa pagnaba man it presyo it mga produktong petrolyo.
Umpisa kato, todo ro pagpamaeabag it mga commuters kon makaangkon it dugang sa pamasahe, makaron hay medyu baton eon it kaabuan nga kinahangean gid man raya it mga driver .
May mga driver nga eubusan eon nga nagpundo sa pagbiyahe ag nakipagsapalaran eon sa ibang paeangitan-an.
Rason nga samtang nagahueat ag nagaeaum kita nga magnaba eon ro presyo it petrolyo, kinahangean nga mas pamayaron pa ro pagtipid ag pag-budget.
Tanan nga raket nga puwedeng sudlan, go eon, basta legal.
