Kalibo Aklan —- Gusto it pamilya Amador nga mapabueong sa espesyalista sa siyudad it Iloilo ro sangka sang buean nga eapsag nga babaye nga may sakit nga hydrocephalus.
Suno kay Jessica Amador, lola it eapsag nga si Ariana, residente it Brgy. Libas, Banga nga kat nagpa-ultrasound ro anang umagad nga si Elizabeth Diana Namayan hay natukiban idtu nga may bukoe ro unga sa anang ueo .
Pag-unga sigon sa baby pinaagi sa ceasarian section hay nataeupangdan nga sungi pa raya.
Nag-50/50 pa suno kana ro anang apo ag ginbutang sa Intensive Care Unit (ICU) matapos nga naduea ro anang heart beat pagkatawo.
Samtang, indi sigon nanda mapakonsulta sa espesyalista ro eapsag bangud sa kakueangan it kwarta .
Nasayuran nga ro ama it eapsag nga si Arnel Amador , 21 anyos hay nagatrabaho bilang security guard samtang ro anang asawa nga 17 anyos hay plain housewife .
Aminado man si Mrs. Amador nga mga bata pa nag-live-in ro daywa , kun sa siin ro babaye hay 14 anyos pa eamang kato hasta nga nakaangkon sanda it sambilog nga unga makaron .
Nagapa-pre-natal man sigon ro ina it eapsag samtang nga naganabdos sa andang health center ag gintaw-an man it mga vitamins , apang may kahigayunan nga gin-ubo raya .
Sa makaron hay naga-apela gid it bulig pinansiyal ro pamilya Amador sa mga natungdan nga ahensiya it gobyerno ag sa mga may mabinueawanon nga tagipusuon agud nga madaea ro eapsag sa eksperto para sa insigidang pagpabueong kara.
