KALIBO, Aklan—Nag-umpisa eon nga magpatuman it hugut nga seguridad ro French government para sa gina-abangan nga 2024 Paris Olympic Games sa maabot nga Hulyo 26 hasta Agosto 11.
Suno kay Bombo International Correspondent Den Araneta, tumandok it Brgy. Cabugao, Batan ag sangka Overseas Filipino worker sa Paris, France nga gina-obliga eon sanda makaron nga magpakita it QR code maskin siin mag-agto bilang pamatuod nga nagatrabaho ukon residente sanda it nasambit nga siyudad.
Sa kamatuoran suno kana nga ginbutang eon sa pinakamataas nga alerto ro bilog nga France sa ginaeauman nga pagdagsa it maabu nga mga tawo sa gina-abangan nga opening ceremony.
Sangkaterbang pulis ag mga soldado eon sigon ro nakakalhit sa mga estratehikong lugar kun sa siin pirmeng ginadagsa it mga tawo.
Dugang pa ni Araneta nga tuyo it gobyerno it France nga indi eamang magahakot it medalya sa Olympics kundi nga maging madinaeag-on nga host country nga owa it anuman nga problema nga masumaeang.
Nasayuran nga masobra sa 10,000 ro ginaeauman nga delegasyon halin sa bilog nga kalibutan.
Sa pihak nga parte, kaibahan pa suno kana sa plano hay ro pagbawas it numero it mga fans nga pagapasugtan nga magtan-aw opening ceremony bangud sa seguridad.
Haeos 300,000 fans nga may tiket eamang ro pagapasugtan nga magtan-aw.
Paga-obrahon ro traditional opening parade para sa Paris Olympics sa mga baroto sa suba it Seine sa Hulyoy 26.
Raya ro unang kahigayunan nga paga-obrahon ro opening ceremony it summer Olympics sa guwa it main athletics stadium.
Nagakabaeaka ro French security establishments sa pagpatigayon it nasambit nga open-air parade bangud sa mabudlay nga pagkontrol sa mga fans ag ro peligro sa terror attacks.
Nabudlayan man ro mga otoridad nga engganyuhon ro mga historic Parisian booksellers nga temporaryong aywan ro andang mga baligya sa kilid it suba.
Sa makaron hay nagapabilin nga masako ro organizers sa mga finishing touches sa mga ginabutang nga mga structures sa pagahiwatan it mga event.
Naga-abot sa 22 ro mga atletang Pinoy ro magapasakop sa Paris, Olympics.//
