NEWS Analysis–bag-o eamang nga nagtaas ro presyo it tinapay, instant noodles, sardinas, karne, corned beef, meat loaf, gatas, naka-botelyang ilimnong tubi, sabong pampaligos, sabong pang-eaba, battery, kandila, asin ag maabu nga iba pa ag makaron hay magataas eon man suno sa Department of Trade and Industry (DTI).
Gin aprubahan eon it DTI ro suggested retail prices ukon SRPs it 82 nga produkto nga ginaeakipan it sardinas, gatas ag instant noodles bangud sigon sa mabahoe nga gastos sa produksiyon it mga raya.
Gin-aprubahan it DTI ro SRPs ko Mayo 11.
Kaibahan pa sa mga produkto nga magataas ro presyo it asin, sabong pang-eaba, delatang karne, corned beef, kape ag battery.
Ro pagtaas sa presyo it mga nagapangunang baeak-eon hay kadungan man sa pagtaas it mga produktong petrolyo.
Haeos kada domingo ro oil price hike nga mabug-at nga paeas-anon sa mga motorista.
Makaron nga magataas eon man ro presyo it mga nagapangunang baeak-eon, ano ro madangatan it kabuhi it mga pigado nga “isang kahig, isang tuka”.
Maskin ro mga nagadildil it asin hay apektado man bangud nga maskin raya hay nagtaas eon man.
Ro iodized rock salt nga 500-grams hay magiging P15.70 eon halin sa dating P11.25.
Makaeoeo-oy man ro mga may sangkiri nga sweldo nga ginapa-igo eamang ro kita.
Magabaylo eon ro administrasyon sa masunod nga buean ag kabay nga maka-obra it pamaagi ro bag-ong gobyerno agud nga mapanaba ro presyo it mga baeak-eon.
Nauna eon nga ginhambae ni incoming president Bongbong Marcos nga panabaan ro presyo it bugas sa balor nga P20 pesos kada kilo.
Kabay nga raya hay matabu agud nga maskin paalin hay mapahagan-hagan ro kabudlay it mga “isang kahig-isang tuka” nga maskin asin hay mataas man ro presyo.
Makaeoeo-oy ro mga nagadildil it asin.
