KALIBO, Aklan—Uman nga naka-experiensiya it mga pagbaha-baha sa pilang mga lugar sa isla it Boracay.
Raya hay kasunod it pagsueod it tiempo it tag-uean sa nasyon.
Suno kay Elena Tusco-Brugger it Philippine Chamber of Commerce and Industry ukon PCCI-Boracay nga maabu nga mga resorts owners ag mga residente ro dismayado sa sitwasyon bangud nga apektado bukon eamang sanda kundi maskin ro mga turista.
Ginpahayag dugang nga makabig nga long-overdue eon ro problema bangud nga kato pang 2016 kat owa pa ginpaidaeum sa rehabilitasyon ro isla hay problema eon nanda ro maeapnagon nga pagbaha eabi eon sa mga low-lying areas.
Ro eubus sigon nga naapektuhan it pagbaha hay ro mga turista partikular ro mga dumueuong nga naghambae nga indi eon magbalik it uman sa Boracay bangud sa bukon it manami nga experiensiya.
Makapilang beses eon man sigon sanda nga naglunsar it signature campaign agud nga maaksyunan it lokal nga gobyerno it Malay ro problema, apang puro band-aid solution eamang ro gina-obra.
Nag apela man sandang mga negosyante sa Tourism Infrastructure and Enterprize Zone Authority ukon TIEZA kaibahan ro sangguniang bayan it Malay pinaagi sa pagdihon it sangka resolusyon nga padasigon eon ro pagtapos sa mga naumpisahan nga proyekto partikular ro drainage system.
Nagaeaum man sanda nga maging pro-active ro LGU sa pagresolba sa problema agud nga malikawan nga matabu it uman ro ginakahadlukan nga Boracay closure.
