Pilang pulitiko ro gina-alegar nga owa nagabayad it andang konsumo sa kuryente, suno sa National Electrification Administration ukon NEA ag kay Senador Erwin Tulfo.
Ginbulgar ro isyu sa pagpamati it Senate Committee on Energy. Suno kay NEA Administrator Antonio Almeda, may mga electric cooperative nga ginapanag-iyahan ukon ginadumaeahan it pilang pulitiko nga owa nagabayad it konsumo sa kuryente nga posible sigon nga ginapasa sa ibang consumers bilang kaparte it kabilugan nga baeayran.
Bangud kara, ginpahayag it NEA nga naputuean eon it suplay it kuryente ro pilang pulitikong owa nagabayad.
Gin-engganyo man ni Tulfo ro publiko nga isugid sa anang taeatapan ro mga pulitikong may owa nabayarang electricity bill agud nga maaksyunan raya.
Samtang, ginasueong it Department of Energy, NEA ag iba pang stakeholders ro pag-amyenda sa Anti-Pilferage of Electricity and Electric Transmission Lines/Materials Act agud nga mas pa nga mapabaskog ro saeabton sa ilegal nga paggamit ukon pagpanakaw it kuryente.
