IBAJAY, Aklan—Gindagsa it libo-libong mga deboto ro ginpatigayon nga pilgrim mass sa kapyestahan ni Sr. Sto. Niño de Ibajay nga ginsundan it float parade nga nagapakita it mga pangabuhian it mga pumueoyo sa kabaryuhan it banwa it Ibajay.
Ro kaugalingon nga bersyon it Ati-Atihan Festival sa nasambit nga banwa hay nagahighlights sa mga dinati nga ati nga kon sa banwa it Kalibo hay nagakategorya sa balik-ati.
Sambilog pa sa ginadayo kada dag-on sa nasambit nga selebrasyon hay ro maeagkuang float parade nga ginapahauman gid it husto it kada barangay council bangud sa dikara nanda maipakita ro mga ginapabugae nga dunang manggad sa andang baryo ag ro nagatao it pangabuhian sa andang mga pumueoyo.
Kaparehas sa banwa it Kalibo, may street dancing man nga ginapatigayon nga ginapangunahan it mga nagkaeain-eain nga tribu ag grupo.
Nasayuran nga sa bilog nga probinsya it Aklan mag-eowas sa banwa it Kalibo nga ginakabig nga Mother of All Philippine Festival hay pilang kabanwahanan man ro nagaselebrar it kaugalingon nga Ati-Atihan Festival nga ginakaeakipan it banwa it Lezo, Malinao, Batan, Altavas, Makato ag Ibajay.
