KALIBO, Aklan — Suportado it Department of Environment and Natural Resources (DENR) ro pagbawae ko lokal nga gobyerno it Malay sa tanan nga klase it mga disposable plastic sa Isla it Boracay.
Suno kay Community Environment and Natural Resources Office (CENRO)-Boracay OIC Atty. Richard Fabila nga sangka manaming tikang ro ginhimo it munisipyo agud daeayon nga maduea ro mga basurang plastic nga sambilog sa mga nagapangunang problema sa lugar kapin eon sa Boracay.
Sa idaeom it Municipal Ordinance 386, hugot nga ginabawae sa mga hotels, resorts, restaurants ag business establishments ro paggamit it mga disposable plastic items.
Matapos bansagang cesspool, ginpasarado ni Pangueong Rodrigo Duterte ro Boracay sa sueod it an-om nga buean agud taw-an it daean ro paglimpyo ag rehabilitasyon.
