KALIBO, Aklan – – – Sa katuyuang masigurado ro proteksyon sa ikaayong eawas it mga pumueoyo ag maalagaan ro kanami it isla it Boracay, pormal nga ginpaguwa ro Executive Order No. 026 ni Mayor Ceciron Cawaling.
Ro nasambitang EO hay nagamando sa tanan nga mga establisyemento sa isla nga magtaeana it kanya-kanyang plastic containers para sa mga nabubulok nga basura.
Ro mandato hay ginbase ni Cawaling sa Republic Act No. 9003 ukon mas kilaea bilang Ecological Solid Waste Mangaement Act of 2000.
Gin-insister kara nga kinahang-eang makaangkon it maayos, komprehensibo ag ecological solid waste programs ro kada Local Government Unit (LGUs).
Daywang basurahan ukon plastic containers ro gina-ayo sa mga business establishments nga may label.
Lima hasta 10 kilo man ro limitasyon sa kapasidad it basura.
Samtang, ginpasiguro man ro pagsunod sa ginapatuman nga pamaagi para sa ecological waste management.
