KALIBO, Aklan — May una eon nga persons of interest ro mga awtoridad sa kaso it pagbaril-patay sa 35-anyos nga nagapangalakal, agahon it Biyernes, Agosto 2 sa Purok 5, Brgy. Bulwang, Numancia, Aklan.
Maskin nga naka-presu eon sa custodial facility it Numancia Municipal Police Station, apang nagpamalibad anay nga magtau it iba pang detalye ro kapulisan angot sa mga persons of interest samtang nagapadayun pa ro imbestigasyon.
Nasayuran nga ro mag-amang suspek hay ginturo ag ginkilaea it sangka testigo sa krimen.
Sa narekober man nga CCTV footage, nagpaeagiw ro mga suspek nga nakasuksok it facemask sakay it andang motorsiklo paagto sa Brgy. Camanci Norte nga direksyon.
Madumduman nga ginbaril ro biktimang si Jomel Nam-ay Natabio, sangka PWD ag residente it Brgy. Tayhawan, Lezo samtang nakatalikod sakay it anang topdown nga tricycle nga may karga nga mga sako it nakolekta nga mga scrap materials.
Naging brutal ro kamatayon it biktima bangud nga kaeabanan sa mga bala hay tumama sa anang ueo ag iba pang parte it anang eawas.
Ginpahayag dugang nga nakataeana nga pagahaeughugon ro baeay it mga suspek gamit ro search warrant matapos nga gina-alegar nga may naispatan nga baril idtu.
An-um nga basiwo it ginapatihan nga .45 kalibre it baril ro nakita sa gin-eontaran it krimen.
