KALIBO, Aklan—Inde magpundo sa unang adlaw it klase ro police visibility ag pagbisita it mga kapulisyahan sa mga eskwelahan sa natungdan nanda nga banwa kasunod it pagbukas it school year 2025-2026.
Raya ro ginpahayag ni P/MSgt. Jane Vega, tagapaghambae it Aklan Police Provincial Office sa interview it Bombo Radyo.
Suno kana, raya nga programa ag aktibidad it pulisya hay magapabilin sa bilog nga school year bangud sa ginakonsidera nga vulnerable ro mga pamatan-on sa nagkaeain-eain nga klase it krimen ag ginahaeongan gid it husto ro mga kababayin-an.
Mag-eowas kara, gina-intensify man nanda ro programa ag mga aktibidad kaibahan ro Department of Education ukon DepEd agud nga matapna ro bullying sa eskwelahan.
Ginpahayag dugang ni PMSgt. Vega nga saligan sigon it mga estudyante, mga ginikanan ag mga manugturo ro presensya it mga awtoridad anumang oras agud nga magsikyar sa sueod ag guwa it eskwelahan para sa kaeowasan it mga inonga eabi eon sa mga pampublikong eskwelahan nga libo-libo ro mga enrolles.
Samtang sa pihak nga parte, naging malinong, matawhay ag madinaeag-on ro pagbukas it unang adlaw it klase sa bilog nga probinsya it Aklan.
Sa bulig suno kana it iba pang force multipliers hay naging bastante ro deployment it PNP personnel eabi eon sa mga maeagkuan nga eskwelahan bukon eamang it sa banwa it Kalibo kundi sa iba pang kabanwahanan.
