KALIBO, Aklan — Madali eon lang nga mataw-an it katumanan ro handum nga obrahon nga world-class cruise destination ro Isla it Boracay.
Raya ro ginpahayag ni Mr. Niven Maquirang, Executive Assistant to the Office of the Provincial Governor ag Officer-In-Charge it Cruise Ship Operations it Aklan .
Suno kana nga ro proyektong obrahon nga nagapangunang cruise ship hub ro isla sa bilog nga Pilipinas pinaagi sa “Cruise and Fly” concept hay na-materialize may limang dag-on eon ro nagtaliwan.
Owa sigon raya naduso ko una bangud sa kawad-an it pondo.
Ginaboeobanta nga P300 milyon ro gintaeana nga pondo it provincial government para sa proyekto nga Cruise/ Sheltered port sa Brgy. Caticlan, Malay ag dugang nga P810 milyon halin sa Philippine Ports Authority ukon may kabilugan nga P1.1 bilyon.
Padayun sigon ro andang pag-asikaso sa mga kinahangeanon nga requirements partikular ro Environmental Compliance Certificate (ECC) agud nga maumpisahan eon ro proyekto.
Ginpahayag dugang nga kaibahan sa proyekto ro kaugalingon nga dock facility it mga mabahoe nga cruise ship sa Caticlan agud nga indi eon kinahangean nga magdungka sa tunga it dagat.
Sa sistemang “cruise and fly,” maga-travel anay by-air ro mga turista paagto sa Boracay, magapabilin idtu it sang adlaw hasta daywang adlaw ag pagkatapos hay magasakay it cruise ship paagto sa masunod nanda nga destinasyon.
Makabulig suno kana ro cruise ship hub agud nga maka-obra it dugang nga trabaho ag mapataas ro kita it mga lokal nga producer kamana man nga mapataas ro standard sa turismo.
Sa pihak nga parte, ginasugid nga may endorsement eon ro proyekto sa Barangay Caticlan.
Sangka team ro ginbilog ni Aklan Governor Joen Miraflores para sa implementasyon it proyekto.
Kapin sa 17 nga cruise ship ro ginaeauman nga magadungka sa Boracay makaron nga 2026.
