Pormal eon nga paga-umpisahan ro pagbista sa tanan nga mga kaso ni dating Pangueong Rodrigo Duterte matapos nga raya hay kumpirmahon it Pre-Trial Chamber I it International Criminal Court ukon ICC ko adlaw it Huwebes, Abril 23.
Suno kay Rev. Fr. Jude Isidro Rebaldo, kora paroko it St. Isidore the Farmer Church sa banwa it Nabas ag sangka abogado nga base sa desisyon it Chamber, may “substantial grounds” ukon mabakod nga baeasihan para mapatihan nga si Duterte hay responsable sa tatlong counts it crimes against humanity it murder ag attempted murder.
Ginpaathag nana nga sa idaeum it nasambit nga desisyon, maga-atubang si Duterte sa pagbista para sa mga krimen nga ginapasibangud kontra kana nga ginaeakipan it pagpatay sa Davao City ko tiempo it anang termino bilang alkalde umpisa 2013 hasta Hunyo 2016.
Kamana man ro pagpatay kontra sa mga ‘high-value target’ sa mga lokasyon sa bilog nga Pilipinas kat pangueo imaw umpisa Hulyo 2016 hasta Hulyo 17.
Dugang pa ro pagpatay ag hana nga pagpatay sa mga operasyon it paglimpyo it barangay sa bilog nga Pilipinas kat pangueo imaw umpisa Hulyo 2016 hasta Setyembre 2018.
Igasaylo ro mga kaso sa sangka Trial Chamber nga imaw ro magataeana it mga masunod nga tikang para sa pagbista.
Makabig suno kana nga makaron hay pwedeng matawag nga akusado eon si Duterte.
Madumduman nga kan-o eamang hay nagpaguwa it pinal nga desisyon ro ICC nga may jurisdiction raya para bistahon si Duterte.
