KALIBO, Aklan — Nagabaskog ro posibilidad nga ma-acquit si Vice President Sara Duterte sa Senado engkaso nga madayun ro anang impeachment trial, tuga it kakueangan it bastante nga numero it boto para sa conviction.
Kan-o eamang hay nabayluhan ro liderato it Senado ag nagpungko bilang Senate President si Alan Peter Cayetano, sangka kilaeang kaalyado it pamilya Duterte.
Imaw ro ginaeauman nga magapanguna bilang presiding officer sa impeachment trial, sangka posisyong may importanteng papel sa daeagan it pagbista.
Suno kay Rev. Fr. Jude Isidro Rebaldo, kora paroko it St. Isidore the Farmer Church sa banwa it Nabas ag sangka abogado nga nagapabilin nga hangkat para sa mga nagasueong it conviction ro pag-abot sa ginakinahangean nga numero nga 1/3 it boto it mga senador.
Suno kana nga sa presenteng komposisyon it Senado, nakikita nana nga posibleng indi mabo-oe ro bastante nga suporta para mapatalsik sa puwesto si Duterte.
Maskin suno kana nga may nagakaigo nga ebidensiya kontra sa mga ginapasibangud kay VP Sara hay may posibilidad nga mabalewala bangud ro impeachment hay makabig nga numbers game.
Sa makaron hay ginahueat pa ro pormal nga pag-convene it Senado bilang impeachment court, kun sa siin dikara masayuran kon magaresulta sa acquittal ukon conviction ro ginapangatubang nga kaso it bise presidente.
