Matapos nga magbilog si Pangueong Rodrigo Duterte it anang Presidential Transition Committee (PTC) para sa magasueod nga panibag-ong administrasyon, nag-anunsiyo man ro kampo it mga Marcos sa maging counterpart it komite it Malakanyang.
Suno kay kay Atty Vic Rodriguez, spokesman ni presumptive presidente Bongbong Marcos,imaw ro magapanguna it andang transition committe.
Ro iba pang miyembro hay gina-eakutan ni dating Davao del Norte Rep. Anton Lagdameo, dating Manila Rep. Naida Angping ag South Cotabato Gov. Jun Tamayo.
Dugang pa ni Rodriguez nga ro andang komiteba hay ginmanduan nga magtrabaho kaibahan ro Malacañang’s Presidential Transition Team nga gina-eakutan man nanday Foreign Affairs Secretary Teodoro Locsin Jr., Finance Secretary Carlos Dominguez, Budget Undersecretary Tina Rose Marie Canda ag Socioeconomic Planning Secretary Karl Chua.
Tuyo sigon it nasambit nga pagpili it mga komiteba nga maging maayos ukon “smooth” ro turnover it pagdumaea it gobyerno sa bag-ong presidente it Pilipinas.
Madumduman nga sandig sa laye nga ro pagdumaea ni Pangueong Duterte hay magatapos sa June 30,2022.
Sa ginpaguwa nga Administrative Order ni Pangueong Duterte ginasiguro nga maging polisiya sigon it anang administrasyon nga ubrahon ro tanan nga pamaagi nga maka-angkon it “peaceful, orderly, and smooth transfer of powers” paagto sa bag-ong duly-elected president.
