KALIBO, Aklan —- Ginpatawag eon it barangay council it Manocmanoc sa Isla it Boracay ro tatlong gasoline station angot sa sobra-sobrang pagtaas sa presyo it diesel ag gasolina.
Suno kay Punong Barangay Nexon Sualog nga maskin nga may pilang rason kon ham-an nga mas mataas ro presyo it petrolyo sa isla, kun sa siin mabahoe nga kontribusyon kara ro transportasyon, apang masyado sigon nga mabahoe ro presyuhan kumpara sa mainland Malay.
Nakabaton eon man sigon sanda it reklamo halin sa pilang mga consumer angot sa sobrang mataas nga presyo it petrolyo.
Sa Boracay, nagahampang sa P97 hasta P98 ro kada litro it gasoline samtang masobra sa P80 ro kada litro it diesel.
Dugang pa ni Sualog nga nagpromisa ro nasambit nga mga gasolinahan nga igapa-review sa andang supplier ro presyo it langis.
Sa pihak kara, gintugyan sigon nanda ro nasambit nga isyu sa Department of Energy (DOE) para sa nagakaigo nga imbestigasyon.
