Gaabot hastya sa 2027 ro pagtaas it baeayran sa kuryente, suno sa Energy Regulatory Commission (ERC).
Suno kay ERC Chairperson Monalisa Dimalanta, matapos sa Setyembre ro gintunga sa ap-at nga price increase halin sa Wholesale Electricity Spot Market (WESM) kasunod it mga gindeklara nga red alert ko summer.
Pag-abot it Oktubre, maga umpisa man ro price increase it mga natural gas plant nga kinontrata it Manila Electric Company (Meralco).
Gin-athag ni Dimalanta nga ro mga natural gas plant nga nasambit hay nakabuoe it suplay halin sa Malampaya natural gas field apang bangod sa amat-amat nga naga sangkire ro suplay nga nabubuoe kara, naga import eon ro ibang planta it Liquefied Natural Gas (LNG).
Kaparehas it diesel plant nga padayon ro pagtaas it rate it kuryente, ginhambae ni Dimalanta nga uwa man naga pundo ro presyo it natural gas plant bangod sa pabag-o bag-ong presyo it LNG sa world market.
Bangud sa problema it padayon nga pagtaas it presyo it kuryente, ginatueak makaron it administrasyong Marcos ro mas maabo nga planta it renewable energy, kaibahan eon ro nuclear power plant.
