KALIBO, Aklan — Ginakabig eon nga first-class province ro Aklan sa patag it income classification.
Raya hay base sa Department Order No. 074 – 2024 nga gin paguwa it Department of Finance ag magiging epektibo sa Enero 1, 2025.
Indikasyon sigon raya nga ro administrasyon hay una sa tamang direksyon agud nga mapasaka ro pagpangabuhi it mga pumueuyu halin sa kapigaduhon .
Angot kara, ginpasaeamatan ni Aklan Governor Joen Miraflores ro pagtinguha it mga lokal nga gobyerno, negosyo, ahensya, institusyon, ag bilog nga pumueuyung Akeanon.
Madumduman nga sa State of the Province Address ko Huwebes nga adlaw it gobernador, anang ginbida ro pagsueong it Aklan paagto sa ‘sustained’ ukon pang mabuhayan nga economic development bukon eamang sa Western Visayas kundi sa bilog nga nasyon.
Apela pa it opisyal nga padayunon ro pagkaeasugot ag pagbueuligan para sa padayun nga ika-umwad it probinsiya it Aklan.
Sa pihak nga parte, ro banwa it Ibajay hay na-reclassify halin sa pagiging 3rd class paagto sa 1st class municipality samtang ro Banga hay na-reclassify halin sa 3rd class to 2nd class.
Ro mga banwa mat-a nga na-reclassify halin sa 3rd class to 2nd class municipality hay ro Libacao ag New Washington.
Ro banwa it Nabas halin sa pagiging 4th class hay naging 2nd class municipality eon makaron.
Ro mga banwa man nga madinaeag-on nga na-reclassify halin sa 4th class to 3rd class municipality hay ginaeakipan it Altavas, Balete, Batan, Madalag, Makato, Malinao ag Numancia.
Samtang, ro mga banwa it Buruanga, Lezo ag Tangalan hay na-reclassify makaron halin sa 5th class to 4th class municipality.
Ro capital town nga Kalibo ag banwa it Malay nga imaw ro may hurisdiskyon sa Isla it Boracay hay nauna eon nga gintumod bilang mga first class municipality, kun sa siin padayun ro pagtinguha it andang lokal nga gobyerno nga maging sangka siyudad .
