KALIBO, Aklan—Ginkumpirma it Department of Social Welfare and Development (DSWD) Region 6 nga mabahoe nga problema sa gihapon ro prostitusyon sa isla it Boracay.
Suno kay Anna Karla Villanueva, Secretariat it Regional Inter-Agency Committee against Trafficking and Child Pornography at Violence Against Women’s and their Children (VAWC) it DSWD-6, pamatuod kara ro na-rescue ko Abril nga 33 nga mga kababayin-an nga nagresulta man sa pagka-aresto sa ap-at nga mga bugaw.
Aminado ro ahensya nga nabudlayan sanda nga tapnaon ro prostitusyon sa isla bangud nga kaabuan sigon sa mga biktima hay ginusto man nanda nga magsueod sa kapareho nga klase it trabaho bangud sa ginatawag nga “easy money”.
Paathag pa ni Villanueva, ro mga naaresto sa operasyon hay andang gintanyagan it ibang trabaho sa idaeum it programa it gobyerno apang mas ginapili it mga raya nga magbalik sa andang trabaho kun sa siin , madali ro kwarta.
Nasayuran nga sa bilog nga rehiyon, pangaywa ro prostitusyon sa pinakamaabung kaso it human trafficking ag base sa datos it pulisya ko nagtaliwan nga dag-on, nailista ro 18 nga kaso kasunod sa sa 28 nga kaso it exploitation.
