KALIBO, Aklan — Plano makaron ni acting mayor Frolibar Bautista it Malay ro pagpatindog it mga public toilet sa isla it Boracay kasunod it nag-viral nga video, kun sa siin, nasip-eatan ro sangka Chinese nga babaye nga ginahugasan sa baybayon ro anang unga nga naghigku samtang ro sambilog pa hay nakitang gina-eubong sa baeas ro diaper.
Sa makaron hay uman nga ginbuksan it Department of Environment and Natural Resources (DENR) ro parte it Station 1 nga temporaryong ginpasarado sa sueod it 48 oras agud nga mausoy ro kontrobersiyal nga diaper.
Eowas eon man sigon nga paligsan ro dagat sa lugar matapos magtuhaw sa resulta it coliform bacteria level test sa water samples nga una eon raya sa safe level.
Suno pa kay Bautista, kun amat ro “tawag ng kalikasan” hay indi malikawan.
May daywa sigon nga public toilet dati nga maeapit sa beachfront sa Station 2 ag 3, apang raya hay ginpaguba sa pagsueod it Boracay Inter-Agency Task Force.
Samtang, ginpasiguro it alkalde nga magapakalhit pa it mga beach guards ag Malay Auxiliary Police sa beachfront ag bilog nga isla agud nga maaresto ro mga naga-eabag sa ginapatuman nga kasuguan.
