Umarangkada eon ro pagpamati it Senado sa nagakalhit nga text scam nga nag-level up eon bangud nga nasayuran eon nanda ro pangaean it andang ginapadaehan it mga mapang-budol nga mensahe.
Maabu ro nagagamit it mobile phones ro owa nakaeowas sa makarondaya nga modus nga makabig nga owa it ginapatawad.
Basta siguro nga may cellphone, bo-oe eon nanda ro mga personal nga impormasyon.
Nadismaya ro mga senador, partikular si Sen. Grace Poe sa National Telecommunications Commission (NTC).
Medyu owa sigon nakitaan it insigidang pag-aksyon ro taeatapan kundi ro gina-obra eamang hay ginahambaean ro mga telcos nga magtau sa andang mga kostumer it paandam.
Puro eang paandam, owa man it gina-obra.
Puro makarondaya ro mabatian , kumbaga, bahala ro sangka indibiduwal nga protektahan ro andang kaugalingon ag kon indi magadahan hay mabiktima imaw.
Nakueangan si Senator Poe sa aksyon nga mag-isip ukon mag-obra man lang it pamaagi agud nga matapna ukon may madakpan sa mga eakot kara .
Kon amat hay may pagtueur-an pa nga nagakatabu sa tunga it mga ahensya nga dapat hay sanib-puwersa sanda.
Bukon it hinangae ro nagiging eapnaag nga text scam.
Maskin nga pirmeng magpadumdum, siguradong may mabiktima ag maga-kagat sa modus it sindikato rason nga mas mayad nga mausoy ag matapna ro mga eakot kara .
Kasuhan ag ikulong.
Kun may masampolan sa mga raya, magapundo ro ibang nadaeahig man.
Haeuga masyado rason nga padayun ro operasyon it mga kawatan ag mga nagapang-budol.
