KALIBO, Aklan–Ginbo-oe eon it probinsiya it aklan ro pag-require it QR codes sa mga turista agud nga makasueod sa isla it Boracay.
Sa ginpaguwa nga executive order nga pirmado ni Aklan Gov. Jose Enrique Miraflores ko nagtaliwan nga adlaw nga magiging epektibo sa Oktubre 29, bukon eon it obligado ro mga turista nga magbo-oe it QR codes agud nga makabakasyon sa Boracay, ro nagapangunang beach destination sa nasyon.
Suno kay Felix Delos Santos, Malay chief tourism officer nga agud nga makasueod sa isla, ro turista hay kinahangean nga magpakita it kopya it confirmed booking slip halin sa DoT-accredited accommodation establishment ag na-fill-apan nga tourist registration form nga sangka pamaagi agud nga mahuyap ro mga turista nga nagasueod.
Ginaeauman nga mas pang magataas ro tourist arrivals sa Boracay bangud sa paghaeuga it mga restrictions eabi eon makaron nga long weekend.
Sa Nobyembre 29 hay iga-activate ro andang municipal incident management team para sa kaeowasan it mga turista ag residente.
Kadungan kara, gin engganyo ni Delos Santos ro tanan nga tourism frontliners, service providers ag enforcers nga magpasakop sa andang “project prestine”, sangka long week-end clean-up activities ukon paglimpyo sa mga baybayon ag palibot it Boracay.
Samtang, makaron nga buean it Nobyembre hay uman nga nagsaka ro tourist arrivals nga naga-average sa 4,000 hasta 6,000 kada adlaw.
Ro buean it Nobyembre hasta Disyembre hay ginakabig nga super peak season sa Boracay.
