KALIBO, Aklan—Sa pihak nga naging produktibo ro ginpatigayon nga legislative inquiry ko nagtaliwan nga domingo, apang may mga bagay nga gusto pa nga maklaruhan ro sangguniang panlalawigan angot sa natabu nga pagbawi sa eugta it 44 nga katutubong ati nga nawad-an it ilistaran tuga it land dispute sa Boracay.
Suno kay provincial board member Nemesio Neron nga eubus sanda nga nagakasubo sa natabu kun sa siin gusto nanda nga mausisa kon may baeasihan ro pag-take-over it land developer nga naga-claim sa eugta.
Raya hay kasunod it panindugan it mga katutubo nga owa sanda it nabaton nga kopya ag maskin ro andang abogado nga nakansela eon ro Collective Certificate of Land Ownership Award nga gin-isyu kanda it nagtaliwan nga duterte administration pinaagi sa department of agrarian reform ukon DAR ko Nobyembre 2018.
Paga-usisaon man sigon nanda kon naeabag ro kinamatarung it mga katutubo sa natabu nga insidente.
Dapat suno kana nga mapabilin ro integridad ag kredibilidad it office of the president.
Madumduman nga nakibot eon lang ro mga katutubong ati nga puro mga miyembro it Boracay Ati Tribal Association matapos nga sudlon it mga armadong kaeaeakin-an ko marso 26 ro kapin sa 1,282 square meter nga eugta nga andang gin-develop ag gin-istaran.
Nagaeaum si Neron nga sa pihak it natabu hay magapabilin ro pagpati ag respeto it mga katutubo sa gobyerno .
Ro isyu hay ginatutukan makaron it committee on laws, rules and ordinances ag committee on indigenous peoples, person with disabilities and senior citizens it provincial board.
