KALIBO, Aklan — Aprubado eon sa ikatlo ag ulihing pagbasa it Senado sa botong 19-0 ro ginproponer nga laye nga nagatuyong matunga sa daywang distrito ro probinsya it Aklan.
Ginpasaeamatan ni Aklan lone district representative Carlito Marquez ro suporta it mga pumueoyo sa anang gin-akdang House Bill No. 7522 ukon An Act Reapportioning the Province of Aklan into Two Legislative Districts.
Magabukas sigon raya it bag-ong kahigayunan sa mga taga-Aklan ag pag-angkon it dugang nga representante sa Kongreso.
Magadoble man sigon ro Priority Development Assistance Fund (PDAF) kada dag-on para sa probinsya
Samtang, kumpiyansa si Marquez nga eubusang magiging laye ro redistricting it Aklan antes ro pagdihon it kandidatura sa Oktubre it mga magapailihir sa 2019 midterm elections.
Nasayuran nga inde makaangkon it bicameral conference committee matapos nga gin-adopt it Kongreso ro bersyon it Senado.
Magadiretso eon raya sa taeatapan ni Pangueong Rodrigo Duterte agud mapirmahan ag eubusang maging laye.
Ro first district it Aklan hay ginakaeakipan ko mga banwa it Kalibo, Altavas, Balete, Batan, Libacao, Madalag, New Washington ag Banga samtang ro second district hay ginakaeakipan it Malay, kon siin makit-an ro Boracay, kamana man ro iba pang mga banwa sa western side nga Buruanga, Ibajay, Nabas, Malinao, Tangalan, Makato, Numancia ag Lezo.
