KALIBO, Aklan–Rido ukon ubusan it lahi ro ginatan-aw nga motibo sa pagpatay sa sangka ex-convict nga gin-eambangan ag ginbuno bandang alas-12:12 kaina it aga-aga sa Brgy. Sipac, Malinao.
Suno kay P/ Capt. Gilbert Batiles, hepe it Malinao Municipal Police Station nga samtang nagapa-uli halin sa baylihan ro biktimang si abner rose, sa legal nga edad ag residente it brgy. bulabud, malinao, kat eambangan ag gin-gilitan sa leog it suspek nga si john mark imaculata, 35, ag kasimaryo it biktima.
Gintinguhaan pa nga madaea ro biktima sa aklan provincial hospital , apang patay eon kat maka-abot .// base sa pahayag it pilang testigo, nakaangkon anay it komprontasyon ro magtimbang nga parte hasta nga nabun-an ro biktima.
Ro biktima hay haeos limang nga buean pa eamang nga nakahilway halin sa pagkakulong sa new bilibid prison bangud sa rido.
Nasayuran nga pilang miyembro eon it magtimbang nga pamilya ro namatay bangud sa pagbaea-eusan nga nag-ugat pa sa andang mga ninuno nga ginpasa sa ulihing henerasyon.
Ko dag-on 2014 hay nawakasan eon ro owa pagka-ilintindihan sa magtimbang nga pamilya matapos nga magpatunga ro lokal nga gobyerno ag kapulisan it Malinao.
Ro kutsilyo nga gingamit sa krimen hay narekober mismo sa poder it suspek nga insigidang naaresto it mga otoridad.
Ginapahaum eon it kapulisan ro pagpasaka it nagakaigo nga kaso kontra sa suspek.
Samtang, nagpamalibad anay nga magtau it anuman nga pahayag si imaculata sa Bombo Radyo Kalibo nga presente eon nga nakakulong.
