Nagpasugot ro online gaming platform nga Roblox nga ieakip ro Philippine Identification System (PhilSys) sa andang sistema para sa age ag identity verification it mga user sa Pilipinas.
Suno sa Cybercrime Investigation and Coordinating Center (CICC), raya hay ginkasugtan matapos makipagpueong ro mga opisyal it gobyerno sa mga executive it Roblox sa Singapore agud nga talakayon ro mas hugut nga proteksyon kontra sa online grooming ag extremist recruitment.
Ginaeauman nga maga-abot sa Pilipinas sa unang domingo it Setyembre ro technical team it Roblox agud nga tun-an ro implementasyon. Posibleng mataw-an it katumanan ro integration sa Oktubre.
Sa idaeum it bag-ong tikang, mas instrikto nga age-based restrictions ro igapatuman sa communication features agud nga mabawasan ro pakikipag-angot it mga unga sa mga user nga nasa ibang age group. Ro mga account nga indi igapaidaeum age check hay posibleng maduea-an it access sa chat ag malimitahan ro paggamit it pilang hampang.
Suno kay ICT Secretary Henry Aguda, makabulig man ro mas hugut nga identity verification agud nga matumod ro mga adult user nga pwedeng gumamit it pekeng pagkatawo para magpang-groom ukon magsamantala sa mga unga.
Plano man sigon it Roblox nga magtukod it opisina sa Pilipinas sa buean it Oktubre para mapadasig ro koordinasyon kara sa mga awtoridad.
Samtang, nakipagpueong man ro gobyerno sa Meta, parent company it Facebook ag Instagram, agud nga talakayon ro child safety ag harmful online content.
