KALIBO, Aklan — Sa ikaywang kahigayunan, ‘no show’ gihapon ro pamunuan it Rotaflex Construction Development Corp. sa ginpatawag nga committee hearing as a whole it Sangguniang Bayan ko nagtaliwan nga Oktubre 23 agud nga pagasayuron ro angot sa daeagan it construction it bag-ong Kalibo public market.
Suno kay SB member Engr. Emerson Lachica, chairman it Committee on Infrastructure ag nagtindog nga presiding officer sa nasambit nga hearing nga raya hay sa pihak it andang ginpadaea nga sueat ag ginbaton man it project engineer nga si Engr. Maria Loreta Javier.
Blangko sigon sanda sa rason kon ham-an owa gihapon nakasipot ro nasambit nga contractor.
Apang maskin nga owa ro presensiya it nasambit nga kompaniya, ginpadayun sigon nanda ro committee hearing kaibahan ro mga gin-imbitahan nga heads ag representative it nagkaeain-eain nga departmento it munisipyo.
Sa pag-usisa, ginkumpirma it Municipal Engineering Office pinaagi kay Engr. Dave Ignacio nga haeos 60 porsyento eon it proyekto ro natapos.
Naga abot man sigon sa P78 milyon ro na-disburse halin sa kabilugan nga P300 milyon nga pondo nga gin-utang sa banko.
Ginpahayag dugang nga sigidas man ro pakikipag-angot it Office of the Mayor sa contractor angot sa status it accomplishment.
Gusto sigon nanda makaron nga masayuran halin sa structural engineer it building ro stability it proyektio para sa kaeowasan it mga vendors ag mga bumaeakae kasunod it mga nagakatabu nga linog sa nasyon.
Plano man nanda nga i-require ro kompaniya nga makaangkon it logbook agud nga masayuran kon pila ro andang mga tawuhan nga nagatrabaho ag kon bastante ro materyales nga naga-abot agud nga may maipakita engkaso nga magpatigayon sanda it inspeksyon.
Ro LGU Kalibo sigon hay nagatinguha nga mapadasig ro construction bangud sa malisod nga sitwasyon it mga vendors sa andang relocation site sa Kalibo Eastern Side Terminal sa Barangay Andagao .
Ro proyekto hay ginaeauman nga matapos sa February 28, 2026 .
