Kalibo Aklan ——Padayon nga ginahueat makaron it lokal nga gobyerno it Malay ro sabat it Boracay Inter-Agency Task Force angot sa andang rekomendasyon nga saliva test eon lang ro iga-required sa mga turistang magasueod sa Isla sa baylo nga negative Reverse Transcription-Polymerase Chain Reaction (RT-PCR) test result.
Raya hay kasunod it mas pang ginpahaeogaan nga travel restriction sa nasyon.
Suno kay Malay Mayor Frolibar Bautista, ginahueat pa nanda ro approval it task force kon pagapasugtan ro andang hinyo.
Engkaso sigon nga matabo raya hay posibleng magataas pa gid ro tourist arrival sa Isla eabi eon makaron nga summer season.
Ginpahayag dugang ni Bautista nga ro mga turistang nadiskubrehan nga nagpakita it peke nga swab test result halin ko buean it Oktobre ko nagtaliwan nga dag-on hay gindeklara nga persona non grata.
Madumduman nga sa probinsya it Aklan sandig sa pinakaulihing Executive Order Number 05 nga ginpaguwa ni Governor Florencio Miraflores hay inde eon kinahang-ean nga mag quarantine it 14 diyas ro mga magauli sa probinsya mag-eowas eon lang kon magpakita it sintomas ro sangka indibidwal ag kinahangean nga magpakita it negative result it RT-PCR test.
