KALIBO, Aklan — Gin-abisuhan it Philippine Coast Guard (PCG)-Aklan ro LCT Bato Twin, tag-iya it nag-eogdang nga barko maeapit sa isla it Boracay nga magpatigayon it salvage operation sa mas madaling tyempo.
Suno kay Lt. Commander Joe Luviz Mercurio nga kinahang-ean nga madalion ro paghaw-as sa wreckage it barko sa idaeom it eawod agud nga malikawan ro ginakabaeak-an nga oil spill.
Mag-eowas kara, nabutang sigon sa peligro ro mga naga-eayag nga motorbanca ag iba pang barko kapin eon kon low tide sa kabaeaka nga masagi ro idaeom it mga raya.
Nasayuran nga ro cargo vessel hay may kargang haeos 50 toneladang baeas kat mag-eogdang ko Nobyembre 4 matapos hampakon it mabaskog nga hangin ag baeod sa pihak nga bukon man it maeain ro tyempo.
Naghalin raya it Sambiray port bandang alas-9:00 it agahon ag paadto kunta it Manocmanoc port sa Boracay.
Gilayon nga naeowas ro 13 crew kaibahan ro kapitan it barko it mga nagrespondeng rescue teams it PCG gamit ro BRP-Boracay.
Nagapadayon pa sigon ro imbestigasyon sa nasambitang insidente.
