BANGA, Aklan—Ginakabig nga leksyon ni Dave Relojero, sangka architect sa banwa it Banga ro natabo kana matapos nga naduea eon imaw sa eksena sa planong renovation it Banga public market nga nagabalor it P250 Milyon pesos matapos nga may nagdaog eon nga solo bidder.
Ginpaathag kara nga kana nagpaeapit ro lokal nga gobyerno agud nga boe-on ro anang serbisyo nga maghimo it plano ag feasibility study para sa loan purpose nga nagabalor it P200 milyon pesos sa Landbank.
Kat natapos nana raya hay ginpresentar sa sangguniang bayan ag makaywang beses nga gintalakay hasta sa naaprubahan.
Ro Architect Association sa Aklan hay paeareho nga may ginasundan nga percentage para sa transparency it andang serbisyo.
Aang ko ulihi, nasayuran eon lang nga kapin sa P250 Milyon pesos ro naaprubahan it Landbank ag naaward eon ro proyekto sa solo bidder nga ginbuoe it LGU.
Ro masakit pa suno kana hay ana nga plano ag design ro ginamit ko una apang uwa eon imaw sa eksena hasta sa ginhambae it LGU nga may eain nga plano ag feasibility study nga gin-obra ro nagdaog nga bidder.
Ro ginpresentar nga bag-ong plano hay ginapahayag uwa nadeliberate sa sangguniang bayan.
Nasayuran nga naputos sa kontrobersiya ro planong Banga public market renovation bangud sa kawad-an it kongkretong plano ag uwa ginpasayod ro kapin sa 11 ka mga interesadong bidder.
