KALIBO, Aklan — Antes nga magtapos ro 15 diyas sa gintaeana nga palugit ni Pangueong Rodrigo Duterte, sangka convict ro boluntaryo nga nagsurender sa Kalibo Police Station, Huwebes it agahon.
Suno sa 35 anyos nga eaeaki nga na-convict sa kasong murder nga haeos 17 anyos imaw nga na-preso ag nakahilway, mga sang dag-on pa eamang ro nagtaliwan.
Ginpahayag nga 16 anyos pa eamang imaw kat nakomiter ro krimen ag nagpakabuot sa sueod it presuhan rason nga napanaba ro anang prison terms.
Apang owa sigon imaw nakasayud kon sambilog imaw sa mga naka-benepisyo sa kontrobersiyal nga good conduct time allowance ukon GCTA Law.
Nagapati sigon imaw nga nag-agi sa legal nga proseso ro anang paghilway bangud sa sangkaterbang papeles nga ginpirmahan antes nga nakaguwa sa New Bilibid Prison.
Ro convict hay tubong Libacao , apang temporaryong naga-istar sa C. Laserna St. Kalibo.
Eubus sigon imaw nga nagakabaeaka sa shoot to kill order sa mga indi magsurender.
