Sangka eaeaki ro nagpatayon it full tank nga naga-haega it P600.00 ag dayon nga nagpaeagyo sakay sa anang Rusi nga motorsiklo sa Brgy. Fulgencio, Balete, Aklan.
Suno kay PMaj. Bryan Alamo it Balete Municipal Police Station nga may nagreport sigon kanda nga halin sa Tifftine Gasoline Station nga sangka eaki ro nagpatayon it gasolina nga uwa sigon nagbayad kung siin makit-an nga intension gid it suspek ro natabo.
Sa madasig nga aksyon it katapo it kapulisan hay hadakpan man eagi ro 21 anyos nga suspek sa Brgy. Poblacion, Altavas kung siin nga nagtugma imaw sa mga pagsalarawan ku mga biktima ag otoridad.
Paathag man ni PMaj. Alamo nga indi anay mapangaeanan ro suspek para maging patas ro pag-imbestiga ag pagtao it hustisya ag maprotektahan ro pagkakilan-ean it eaeaki.
Nasayuran nga uwa man nagsukoe ro suspek kat gindakop raya, dugang pa nga ag uwa sigon it lisenysa ag ro motor hay uwa man sigon it rehistro.
Plano sigon it suspek nga magbalik sa Iloilo nga naging rason kung ham-an it nagpafull tank imaw kung siin idto imaw gatrabaho apang bukon sigon raya it rason para magpamentaha sa ibang tawo.
