Kalibo Aklan ———Nagahimas it maeamig nga rehas sa locked up cell it Makato Police Station ro sangka eaeaki matapos nga ginbuno ro anang kainuman sa sangka birthday party sa Brgy. Libang, Makato.
Ginkilaea ni PSSgt. Jover Zubiaga ro suspek nga si Roger Labaco, 44-anyos samtang ro biktima hay ginkilaeang si Rocky Santiago, sa legal nga edad ag parehong residente it nasambit nga lugar.
Base sa inisyal nga imbestigasyon it Makato PNP, nag-inuman ro mga raya sa baeay ni Junjun Tambong kon sa siin sa pag-oeolian it mga bisita hay gin-eambangan sigon it suspek ro biktima sa guwa it gate ko baeay samtang nagasakay sa anang motorsiklo.
May kaangtanan kara, nakaangkon it lastro sa likod si Santiago rason nga insigida man nga gindaea sa Aklan Provincial Hospital kon sa siin imaw sa makaron naka-confine para sa anang nagakaigong medikasyon.
Samtang, si Labaco hay gilayon man nga naaresto it mga otoridad ag posibleng magapangatubang sa kasong frustrated homicide.
