KALIBO, Aklan—Binawian it hueam nga kinabuhi ro sangka eaeaki matapos nga maeomos bandang alas-5:00 it hapon sa baybayon nga sakop it station 1 Brgy. Balabag sa isla it Boracay.
Ginkilaea ni Patrolman Kenneth Delos Reyes it Malay Municipal Police Station ro biktima nga si Leonel Salvador, 29 anyos it Brgy. Fulgencio Sur sa banwa it Balete.
Base sa imbestigasyon it pulisya, housekeeping ro biktima sa sangka hotel kon sa siin sa oras it andang breaktime kaibahan ro katrabaho nga si Joivanni Bagaan, 39-anyos it Tigbauan, Iloilo hay nagsaeampitan ro mga raya nga magpaligos.
Apang, bangud sa mabaskog nga current it tubi ag baeod hay ulihi eon nanda nataeopangdan nga dinaea sanda sa madaeom nga porsyon it baybayon.
Ginpahayag dugang nga inde haeos kaantiguhan mag-eangoy ro biktima rason nga uwa raya nakabawi ag daeayon nga naeomos.
Samtang, si Bagaan hay madinaeag-on nga nakabutwa ag napabinit sa bibi it baybayon.
Insigidang gin-usoy it standby nga emergency responders si Salvador kon sa siin umabot it masobra sa napueong minutos antes raya nga nakit-an.
Gintinguhaan pa nga irevive ro biktima apang uwa eon raya nagaresponse.
