KALIBO, Aklan—Ginpakigbahin sa Bombo Radyo it sangka maestra sa Taroytoy Elementary School ro kalisod nga ginapangatubang it mga manugturo agud nga maihatod ro nagakaigo nga edukasyon sa andang mga estudyante.
Suno kay Ritchell Villaron Onao ag tumandok it Barangay Taroytoy, Libacao, Aklan nga masami nga nabubutang sa peligro ro andang kabuhi bangud sa buwis-buhay nga pagtabok sa suba ag pagbaybay it malisod nga daean paadto sa nasambitan nga lugar.
Ginapahayag nga maghalin sa Manika View Point hay abuton pa it haeos pito hasta waeong oras ro andang pagbaktas agud nga makaabot sa andang eskuwelahan ukon siyam nga oras maghalin sa Barangay Poblacion kaibahan eun ro oras it pagbiyahe.
Suno kana nga masami nanda nga nasaksihan ro pagbaha mas kapin kung maeain ro paniyempo.
Pasaeamat man sigon sanda sa mga residente it lugar nga nagabulig kanda agud nga makatabok paadto sa andang eskuwelahan.
Bangud nga owa it signal sa lugar hay kinahangean man sigon anay nanda nga magpadaea it sueat sa mga residente idto antes nga magpadueong sa eskuwelahan.
Sa video man nga gin-upload ni teacher Ritchell hay makit-an ro mga maeastra nga puro tanan babayi nga ginabuligan it mga kaeaeakin-an agud nga makatabok sa suba gamit ro higot ag kahoy.
Bangud sa andang malisod nga sitwasyon hay nagpanawagan man raya sa Local Government Unit ukon LGU-Libacao para sa mas madasig nga construction it daean nga nagakonekta sa nasambitan nga lugar.
