BURUANGA, Aklan—Gindeklara nga patay eon sa Buruanga district hospital ro sangka mangingisda matapos nga ginbuno-patay it kaparehong manginisda nga natabo ko gabie it Abril 11 sa Brgy. Poblacion, Buruanga.
Ginkilaea ro biktima nga si Nelmar Sabrido, 29-anyos samtang ro suspek mat-a nga ginturo hay si Luisito Fedelis, 27-anyos ag residente it Brgy. Nazareth sa nasambit nga banwa.
Sa inisyal nga imbestigasyon it pulisya, ginpahayag ni P/Capt. Christian John Nalangan, officer in charge it Buruang Municipal Police Station, ginsugo ro biktima it anang stepmother nga magbakae it sigarilyo kon sa siin nagapasakay eon kunta raya sa anang motorsiklo kat nakit-an imaw it suspek kaibahan ro anang ama.
Ginkompronta sigon ro biktima it mag-ama angot sa andang dating banggianay hasta sa umabot sa pagbaeaywan.
Dikara eon sigon gumabot it siyaw ro suspek it kutsilyo nga kapin sa 10.5 inches ro kahabaon ag ginbuno sa dughan it biktima.
Nadaea pa raya sa ospital apang gindeklarang patay eon it attending physician bangud sa fatal nga lastro sa anang dughan.
Sa pihak kara, una eon sa kustudiya it pulisya ro suspek matapos nga boluntaryong nagsurender sa alkalde it banwa.
