Kalibo Aklan——Ginbawian it financial assistance sa idaeom it Social Amelioration Program (SAP) ro sangka padre de pamilya sa Brgy. Dumga, Makato.
Raya hay matapos nga nakit-an sa record it Department of Social Welfare and Development (DSWD) nga una pa imaw sa rooster it anang nanay sa idaeom it Pantawid Pamilyang Pilipino Program (4ps).
Suno kay Mark Alvares, nagasalig imaw nga uwa it problema ro anang pagbaton it ayuda bangud nga gin-interview man imaw it Barangay Health Worker (BHW) kaibahan ro Barangay Officials kon sa siin ginsabat man nana it eksakto ro tanan nga pangutana.
Bangud kara, pagkabaton sigon it nasambitang kantidad hay gilayon nana nga gindaeawat it bugas, ginbakae it gatas ag diaper it anang onga kamana man ginbakae it suea.
Aminado imaw nga nakasueod sa 4P’s ro anang ina apang mabuhay eon sigon imaw nga nag-asawa ag uwa eon it ginabaton rason nga nagsalig imaw nga uwa it problema ro anang pagkaeakip sa benepisyaryo it SAP.
Sa pihak kara, ro nabilin nga masobra sa 2,000 pesos hay dato eon lang sigon ro anang ginsurender sa Barangay.
Samtang sa pihak nga parte, ginklaro ni Punong Brgy. Leovegildo Villanueva nga nahuya man kunta imaw nga bawion ro kwarta apang raya ro naging desisyon it ahensya ag engkaso gidman sigon nga ipabalik raya it bilog hay ana eon lang nga paga-abunuhan.
Posible sigon nga uwa nagsugid si Alvares nga kaibahan pa imaw sa rooster it 4Ps’ it anang ina.
Ginpahayag dugang ni Villanueva nga sa adlaw pa it Lunes masayuran kon anu ro magiging desisyon it DSWD sa sitwasyon ni Alvares.
